Ég hafði annað slagið leitt hugann að því að stíga á svið sem uppistandari, en vissi aldrei hvað ég myndi tala um. Þegar að breytingaskeiðið og miðaldra bankaði upp á fann ég það loksins – þannig fór boltinn að rúlla.

Ég sagði æskuvinkonu minni, Línu, frá því að nú væri ég að verða tilbúin að stökkva út í djúpu með þetta. Mig vantaði bara að láta setja mig í aðstæðurnar og þá myndi ég ekki skorast undan. Úr varð að hún bókaði fyrir mig Tjarnarbíó á afmælisdaginn minn, 31. ágúst 2024.

Þannig hélt ég upp á 46 ára afmælið mitt – með fyrstu uppistandssýningunni minni, Miðaldra uppistand: Að finna taktinn. Sýningin lifði fram á næsta vor og með hjálp vinkonu minnar, Dóru Jóhanns, fann ég taktinn á sviðinu.

Stuttu síðar hóf ég samstarf við Auðbjörgu Ólafsdóttur – sem hafði líka stigið á svið á eigin afmælisdegi. Við settum saman Af hverju fórum við ekki bara á gönguskíði?, sem seldist upp í Tjarnarbíó og fór svo á ferð um landið – meðal annars til Akureyrar, Stykkishólms og Flateyrar.

Á Hinsegin dögum 2025 tók ég svo þátt í hinsegin uppistandi og hitaði þar upp fyrir Fortune Feimster – sem var mér mikill heiður.

Um þessar mundir, leikárið 2025-2026, sýnum við Auðbjörg saman Konur þurfa bara … í samstarfi við Tjarnarbíó, með Dóru Jóhanns í lykilhlutverki sem comískum dramatúrg.

Samhliða þessu öllu þá hef ég líka fengið að mæta í fjölda styttri gigga fyrir vinnustaði og hópa – sem mér finnst ekki bara stór skemmtilegt, heldur líka mikil forréttindi.

Þetta er búið að vera ótrúlega skemmtilegt ferðalag og ég trúi því varla hversu stutt er síðan að ég lét vaða!